Prezidan Jovenel Moïse mande pou gen plis tèt ansanm ant Ayisyen nan okazyon komemorasyon 212 lane lanmò Anperè Jean Jacques Dessalines.

 
Prezidan Repiblik la, Ekselans Jovenel Moïse, kite gen bò kotel Premyè Dam nan, Martine Moïse, Premye minis Jean Henry Céant, prezidan Kou kasasyon an, Met Jules Cantave ak plizyè palmantè tankou prezidan chanm depite a, Gary Bodeau ak senatè Gracia Delva, nan okazyon komemorasyon 212 lane lanmò Anperè Jean Jacques Dessalines, mèkredi 17 oktòb 2018 la, mande pou Ayisyen yo met tèt ansanm pou yo viv nan lapè, nan lide pou tout resous peyi a ka rive sèvi pitit peyi a.
Seremoni sa a se te okazyon pou chef Leta a esplike » Peyi Dayiti gen resous anba tèl ki ka penmèt batay pou devlopman an rive yon reyalite », men pou sa rive fèt, li pwomèt leta a ap o sèvis pèp la pou pote plis sèvis, nan tout rakwen peyi bay popilasyon an, sitou sa ki pi vilnerab pou yo ka rejwenn fyète yo .
Prezidan Jovenel Moïse kwè yon lòt bò, pou Ayiti monte sou Ray chanjman ak devlopman dirab la, fòk tout moun enspire yo de ideyal Papa Desalin nan pou yo divòse ak chire pit, esklizyon ak enstabilite, pou nou ka konstwi yon pi bon demen e bay peyi a yon lòt direksyon. Pou sa li mande tour Ayisyen  » mache men nan men pou kwape tout jèm divizyon ki anpeche nou avanse ».
Pandan l tap renouvle volonte l pou l kontinye byen jere resous leta a nan transparans, Prezidan Jovenel Moïse anonse » Tout moun ki manje lajan leta a, lè a rive pou yo vin rann kont », paske batay kont koripsyon se batay nou tout. Pou wete peyi a nan black-out, pou mete plis lekòl pwofesyonèl , chèf Leta a ensiste ke pwosè petwokaribe a ak lit kont koripsyon an ap fèt jan sa dwe fèt, pap gen kase fèy kouvri sa, paske tout moun ki te manje lajan leta ap gen pou vin rann kont kanmenm.
Senatè Gracia Delva ki te pran lapawòl nan seremoni an tou, mande Ayisyen divòse ak divzyon, chen manje chen, ki pa janm ede peyi a vanse depi 212 lane. Senatè a ki kwè Ayiti rive nan yon moman istorik apiye pozisyon chèf Leta a ki vle ke tout moun ki manje lajan leta dwe vin rann kont. Li te tou pwofite renouvle konfyans li nan vizyon chef leta a, ekselans Jovenel Moïse, ki chita sou yon jesyon responsab resous leta a nan lide pou ede rezoud anpil pwoblèm nan peyi a Jan sa ap fèt nan Machan Desalin ki an chantye jounen jodia.
Majistra Machan Desalin nan, Marclin Pierre, nan entèvansyon l esplike  » Ayiti tout ayisyen bezwen an paka konstwi nan kraze brize ».Majistra te tou pwofite tou poul salye inisyativ prezidan repiblik la ki penmèt machan desalin gen kouran ladan l, wout kap konstwi pou mennen vizitè nan sous enperyal, ak yon teren foutbòl pou ede lajenès jwenn lwazi poul devlope pi byen, tankou moun.